Wednesday 31 May 2017

కవిత నెం :293(మనిషి భాగవతం)

కవిత నెం :293
*మనిషి భాగవతం  *

ఒకరికి తెలిసిందే ధర్మం
మరొకరు అనుకునేదే న్యాయం

ఇంకొకరు చెప్తారు వేదం
మరొకరు చూపిస్తారు బేధం

ఒకరికొరకే నీతి
మరొకరు అది చేస్తే అవినీతి

తాను పలికితే ఒప్పు
మరొకరు చేస్తే అది తప్పు

మంచికొరకు ముందుకొచ్చేది ఒకరు
చెడు చెయ్యటమే పనిగా పెట్టుకుంటారు మరొకరు

నువ్వు హేళనగా మాట్లాడవచ్చు
ఎదుటివాడు నిన్ను అమర్యాదించకూడదు

నీకు ఉండదు బుద్ది
ఎదుటివారికి ఉండాలని తినమంటావ్ గడ్డి

నువ్వు సంపాదించవచ్చు డబ్బు
ఎదుటివాడు సంపాదిస్తుంటే నీ కొస్తుంది జబ్బు

నువ్వు నోరు తెరిస్తే అబద్దం
ఎదుటివాడు నిజాలు మాట్లాడినా అది నీకు అబద్దమే

పొగడ్తలతో పొంగిపోతుంటావ్
మరి విమర్శలంటే ఎందుకు భయపడతావ్

నీకు పొగరు అని వేలెత్తి చూపుతావ్
నీలోని అహాన్ని ఎందుకు దాచిపెడతావ్ ?

నమ్మకానికి నిదర్శనం నీవని చెప్తూ ఉంటావ్
కానీ ఎదుటివారిని కించిత్ కూడా నమ్మవ్

కొత్త స్నేహాలకు స్వాగతం చెప్తూ ఎదురెళ్తావ్
నీ సొంత బంధాలను ఎందుకు చెరిపేసుకుంటావ్ ?

నిన్ను ప్రేమతో పలకరించాలి అందరూ
నువ్వు మాత్రం ప్రేమతో ఎవర్నీ పట్టించుకోవు

ఇదే నేటి మనిషుల భాగవతం

- గరిమెళ్ళ రాజేంద్ర ప్రసాద్






Monday 29 May 2017

కవిత నెం :292(మనసు వాంచ)

కవిత నెం :292
*మనసు వాంచ *

మనసారా ఉండాలనీ
మనసు మాట పంచాలనీ
మనసు కిటికీ తెరవాలనీ
అనుకుంటూ చలిస్తుంది ఆ మనసు
ప్రతి స్పందనకై ఎదురుచూస్తూ

తేనెపూసే మాటలొద్దు
తేనెలొలికే మాట చాలు
మత్తు జల్లే మనసు వద్దు
బాధపడినా నిజమే ముద్దు

ముందరకాళ్ల బంధమొద్దు
వెన్నుతట్టే హస్తమే హద్దు
నీ నవ్వులో ఒక చూపు చాలు
నీ నవ్వుతో ఒక పలకరింపు చాలు

మనసంటూ ప్రతీ వారికి
మనసంటూ ఒకటుంటుంది
మనసుని నొప్పించకండి
కుదిరితే మీ స్వచ్ఛనీయమైన
స్నేహంతో మనసుని మెప్పించండి

అదే అదే ఈ మనసు వాంఛ

- గరిమెళ్ల రాజేంద్ర ప్రసాద్ 

Wednesday 24 May 2017

కవిత నెం :290(మారాలి)

కవిత నెం :290

మారాలి మారాలి
ఈ ప్రపంచం మారాలి
నువ్వూ మారాలి నేనూ మారాలి
మనం మారాలి ఈ జనం మారాలి
చూస్తూ ఉంటే రోజులు పోతాయి
కూర్చుని తింటే కొండలు కరుగుతాయి
మనకెందుకు అనుకుంటే
మనల్ని కూడా వదిలించే రోజులు వస్తాయి
ముందుకు కదిలితేనే అడుగు పడుతుంది
వెనకకి తిరిగితే లక్ష్యం దూరమవుతుంది
మారాలి మారాలి
ఈ ప్రపంచం మారాలి
ఎదో ఒకసారి
ఎప్పుడో ఒకప్పుడు
ఎక్కడో ఒకచోట
మార్పు అనేది అవశ్యం
మార్పు ఉండనిదే తత్వం మారదు
మార్పు లేనిదే వ్యక్తిత్వం పుట్టదు
మనం మారుతూనే ఉంటాం
మన పరిసరాలు మారుతూనే ఉంటాయి
కదిలే కాలంతో పాటు
కదిలే మనుషులతో పాటు
మనమూ మారకతప్పదు
మనలో కొంతైనా మార్పు రాక తప్పదు
కాబట్టి మార్పు అనేది ఉండాలి
మార్పు అనేది జరగాలి
ఒక పెనుమార్పు ప్రపంచాన్నే మార్చేస్తుంది
మార్పుకి సమయం , ముహూర్తం ఉండదు
మార్పు ఎప్పుడు వస్తుందో ఎవరికీ తెలియదు
మార్పు జరిగితే సంతోషించు
మంచి మార్పు కోసం నువ్వు పరిత్యజించు
ఒక మార్పుతో నీ జీవితాన్ని కొత్తగా జీవించు

- గరిమెళ్ళ రాజేంద్ర ప్రసాదు 

కవిత నెం :289(నవ్వంటే)

కవిత నెం :289

*నవ్వంటే *

నవ్వంటే నాకిష్టం
నవ్వుతూ ఉండాలన్నది నా మనోగతం
నవ్వుతూ కనిపించే వాళ్లంటే ఒక సంతోషం
నవ్వుతూ పలకరించే వాళ్లంటే ఒక గౌరవం
మాట్లాడుతూ నవ్వు
తిడుతూ నవ్వు
నవ్వుతూ నవ్వు
నవ్విస్తూ నవ్వు
నవ్వెప్పుడూ ఆరోగ్యమే
నవ్వెప్పుడూ ఒక మహా యోగమే
మనస్ఫూర్తిగా నవ్వే నువ్వు
నలుగురికి స్ఫూర్తి నువ్వు
నవ్వుతో సమస్యలు మాయం
నవ్వుకి ఈ జగమే అవుతుంది సలాం

నవ్వంటే నా కిష్టం
నాకు నవ్వాలనే ఉంటుంది ఎప్పుడూ
నవ్వుకి నేను శత్రువును కాదు
నవ్వలేని వాళ్లకు నేను జవాబు కాను


-గరిమెళ్ళ రాజేంద్ర ప్రసాదు 

కవిత నెం :288(నీ ప్రేమలో నా గమనం)

కవిత నెం :288
* నీ ప్రేమలో నా గమనం *

నిన్ను చూస్తే నా కలం సాగుతుంది
నిన్ను చూసాక నా కవిత పొంగుతుంది
నీవున్న చోట ప్రేమ పరిమళిస్తుంది
నీతో కలిసి నడిచే బాట లక్ష్యాన్ని చేర్చుతుంది

నీ మాటల ముత్యాలతో నాలో నవ్వుల జల్లు కురుస్తుంది
నీ సొగసుల వలపు ఆస్వాదించగా అమరత్వం సిద్ధిస్తుంది
నీ కనుల బాస నేర్వగా నాలో జ్ఞానం ప్రకాశిస్తుంది

నీ సాంగత్యం దక్కించుకున్న నేను
అమరేంద్ర రాజేంద్రుడను నేను
నీ ప్రేమ తత్వంతో ముగ్దుడనవుతున్న నేను
భూలోకపు ఇంద్రుడను నేను

నన్ను వలచిన ఈ దేవి దేవతగా వారాలనందిస్తుంటే
నిన్ను పొందగా ఈ జన్మ నూతనత్వాన్ని వసగా పోసుకుంటుంది

- గరిమెళ్ళ రాజేంద్ర ప్రసాదు