341(లోకంలో ఆడపిల్ల)

కవిత నెం  :341
కవితా శీర్షిక : లోకంలో ఆడపిల్ల

ప్రతీ రోజు పేపర్లో
ప్రతీ రోజు వార్తల్లో
ఎక్కడో ఒకచోట
కనిపించే అమానుషం
వినిపించే ఆర్తనాదం

ఏ తల్లి కడుపు ఆవేదనో
ఏ కాముకుడి విషపు క్రోరకో
ఏ క్రూరత్వం కన్నెర్ర చేసెనో

చూస్తుంటే నిస్సాయత
నీడలా నడుస్తుంటే
చూస్తుంటే వారి ఆశలు
నిప్పుల్లో దహిస్తుంటే

ఎలా ఎలా జరుగుచున్నవి
మానవత్వం లేని ''మాన భంగాలు ''
ఎలా ఎలా మార్చేస్తున్నవి
హృదయం లేని మృగ '' మగ రాజు '' లని

ఛి వారి బ్రతుకు ఎందుకు ?
వావి వారసలేని కుక్కలవలే
ఆడదంటే ఎగబడుతూ
తన పుట్టుక ఒక ఆడపేగు అని తెలిసి
మరచే ఆ దౌర్భాగ్యం ఎందుకు ?

ఆనాడు సీత ,ద్రౌపది మాతల గెలుపు
ఈనాడు పుడమితల్లుల రోదింపు
దేశం ఎదుగుతూ ఉంది
మగవాడి బుద్ది మారుతూ ఉంది

దినదినగండం స్త్రీ జీవితం
దారుణ మారణ కాండం స్త్రీ భవితం
రక్షక భటులు ఉన్న ఈ రాష్ట్రంలో
పడతిశీలాన్ని భుజించే భక్షకులు
ఎవ్వరు రావాలి వీరికి వెలుగు నివ్వటానికి
మరెవ్వరు రావాలి ఆడపడుచుల సౌభాగ్యం నిలుపటానికి