మాయ మనిషి
నిజానికి మేడిపండు ఫలం మాత్రమే కాదు,
మన జీవితానికి ఉదాహరణగా నిలిచే రాశి ఫలం.
ఎందుకో ఎత్తెత్తుకి ఎదుగుతున్న మనిషి,
తన బుద్ధిలో మాత్రం మందగిస్తూనే ఉంటాడు.
పైకి మేడిపండులా మెరిసినా,
లోపల కుళ్లు దాచుకుని కంపుకొడతాడు.
తన విజయాన్ని ఆస్వాదించలేడు,
పక్కవాడి ఓటమిలో మాత్రం
కళ్లలో విషపు కాంతిని నింపుకుంటాడు.
తన ఏడుపుని దిగమింగుకున్నా,
పక్కవాడి బాధలో పైశాచికత్వాన్ని పొగడతాడు.
ఒకరి మంచి మాట వినటానికి ఇష్టపడడు,
కానీ జీవిత సలహాలు ఇవ్వటానికి మాత్రం ముందుంటాడు.
పైకి పెద్దమనిషి తరహాలో ప్రవర్తించినా,
సమయం వచ్చినప్పుడు
తన రాక్షస స్వభావాన్ని బయటపెడతాడు.
ఆశ ఎప్పటికీ చావదు,
చుట్టూ ఎంత ఐశ్వర్యం ఉన్నా
తన స్వార్థమే మనసుని కమ్మేస్తుంది.
ఎక్కడ ఉన్నా కీర్తికోసం ఆరాటపడతాడు,
‘అంతా నేనే’ అన్న అహంకారంలో మునిగిపోతాడు.
కుతంత్రాలు తెలిసిన మనిషి కృంగిపోతాడు,
తనకన్నా సాటి మనిషి నెగ్గితే ఓర్చుకోలేడు.
తాను కూడా మనిషే అన్న సత్యాన్ని
మర్చిపోతూ ఉంటాడు.
సంతృప్తి లేకుండా,
సంతోషాన్ని అనుభవించకుండా,
తన జీవితం దుఃఖంలో మునిగిపోతూ ఉంటుంది.
0 comments:
Post a Comment