కవిత నెం 248 ( ఒక చిన్న మాట)

కవిత నెం : 248

మాట మాట ఒక చిన్న మాట 
మనసుని హత్తుకున్న మాట 
మౌనంలోన దాగి ఉన్న మాట 
గొంతు గ్రంథిలో తిరుగుతున్న మాట 

గుప్పెడంత గుండెలో గుప్పుమన్న మాట 
సహస్ర భాషలో చెప్పదగ్గ మాట 
తుళ్లి తుళ్లి పడే తుంటరి మాట 
మళ్లీ మళ్లీ చెప్పాలనే మధురమైన మాట 

కలలోనైనా వెంటాడే కమ్మనైన మాట 
ప్రతి రోజూ వినాలనే పరిపూర్ణమైన మాట 
మల్లెలాంటి సొగసైన స్వచ్ఛమైన మాట 
తేనెలాంటి తియ్యనైన అమృతమైన మాట 

రేయిలో హాయినిచ్చే వెన్నెల మాట 
నీ నవ్వుని చూడగానే వికసించే మాట 
నాలోన ఇన్నాళ్లు నలుగుతున్న మాట 
ప్రతి పూట ఎదలోన తడుతున్న మాట 

ఒకే ఒక మాట పెదవి  పంచుకునే మాట 
ఒకే ఒక మాట మనవి చెయ్యాలన్న మాట 
మరి ఇంతకీ ఏ మాటో చెప్పగలవా నీ నోట నా మాట ?

- గరిమెళ్ళ గమనాలు // 14. 12. 2016//